Nú er það endanlega staðfest að kólumbíski framherjinn Radamel Falcao er orðinn leikmaður Manchester United, sem fær hann að láni frá Mónakó út þetta tímabil.
Falcao virtist vera á leið til Real Madrid á lokadegi félagaskiptagluggans en var seinni partinn kominn til Englands fyrir skiptin til United. Eitthvað dróst þó á langinn að ganga frá því í tæka tíð fyrir lok gluggans og fengu félögin aukinn frest til að klára skiptin sem nú eru í höfn, tveimur og hálfum tíma eftir að glugganum var formlega lokað.
United greiðir 6 milljónir punda fyrir lánssamninginn, en Falcao var keyptur á 50 milljónir punda frá Atlético Madrid síðasta sumar þar sem hann hafði farið á kostum og skoraði 52 mörk í 68 leikjum. United hefur möguleika á að kaupa hann á 43,5 milljónir punda þegar lánssamningurinn rennur út.
Hjá Mónakó skoraði Falcao 11 mörk í 20 leikjum, en meiddist illa seint á síðasta tímabili og það hélt honum frá keppni á heimsmeistaramótinu í Brasilíu. Hann á að baki 51 landsleik fyrir Kólumbíu og hefur skorað í þeim 20 mörk.
BREAKING: #mufc is delighted to announce Radamel Falcao has joined on a 1-year loan from Monaco with an option to buy pic.twitter.com/gnhR4rdsmF
— Manchester United (@ManUtd) September 2, 2014