Solskjær sagður semja um starfslok

Ole Gunnar Solskjær var ekki viðstaddur æfingu hjá Aroni Einar Gunnarssyni og öðrum lærisveinum sínum í Cardiff í dag. Hann fundaði þess í stað með forráðamönnum félagsins.

Enska götublaðið The Sun greinir frá þessu og segir að Solskjær sé nú að semja um starfslok hjá velska félaginu.

Stuðningsmenn Cardiff bauluðu á Solskjær eftir 1:0-tap á heimavelli fyrir Middlesbrough í gær en liðið sem lék í ensku úrvalsdeildinni á síðustu leiktíð hefur tapað þremur af síðustu fjórum leikjum sínum í B-deildinni. Alls vilja 77% þeirra losna við Solskjær samkvæmt könnun.

„Ef maður nær ekki réttum úrslitum þá lendir maður undir pressu. Við bjuggumst ekki við því að vera í 17. sæti eftir sjö leiki. Við vissum að við ættum erfiða leiki fyrir höndum en við bjuggumst við því að fá meira en 1 stig úr 4 leikjum,“ sagði Solskjær við Walesonline.co.uk í gær.

• Blogga um frétt