Rodgers: Breytir engu þó að Bale vanti

Brendan Rodgers knattspyrnustjóri Liverpool segir að fyrir félag á borð við Real Madrid skipti það litlu máli þó að dýrasti knattspyrnumaður heims, Gareth Bale, sé meiddur.

Liðin tvö mætast á Anfield í kvöld kl. 18.45 í Meistaradeild Evrópu. Real hefur verið á miklu skriði og sallað inn mörkum í spænsku 1. deildinni en Liverpool hefur átt erfiðara uppdráttar í ensku úrvalsdeildinni.

Bale á við meiðsli að stríða og missir af leiknum í kvöld sem og El Clásico á laugardaginn. Án hans er Real Madrid samt sem áður sigurstranglegra á Anfield í kvöld að flestra mati.

„Gareth Bale er heimsklassaleikmaður með gríðarlegan hraða og hæfileika, en hópurinn hjá Real Madrid er bara þannig að leikmaður á borð við Isco kemur inn í staðinn svo að mér finnst við ekkert græða á því að hann spili ekki,“ sagði Rodgers.

„Þetta verður virkilega erfiður leikur fyrir okkur. Þeir eru með hóp sem er fullur af leikmönnum í hæsta gæðaflokki,“ bætti Rodgers við, en viðurkenndi svo að einn skaraði líklega fram úr.

„Auðvitað eru þarna einstakir hæfileikar í Cristiano Ronaldo, sem sennilega er besti leikmaður heims í augnablikinu. Hann hefur þróast úr einspilara sem skorar mörk í hreinan markaskorara, og tölfræðin talar sínu máli. En við verðum að skoða hvernig við völdum öllu Real Madrid liðinu vandræðum, áður en við skoðum einstaka leikmenn,“ sagði Rodgers.

• Blogga um frétt