Samir Nasri, franski miðjumaðurinn hjá Manchester City, segir að leikmenn liðsins megi búa sig undir að vera seldir og aðrir fengnir í staðinn ef þeim mistakist að komast áfram úr riðlakeppni Meistaradeildar Evrópu í knattspyrnu.
Þrátt fyrir gífurlega sterkan leikmannahóp hefur City ekki unnið leik í keppninni í vetur, er neðst í sínum riðli með tvö stig úr fyrstu fjórum leikjunum, og verður að vinna Bayern München í kvöld til að eiga möguleika á að komast áfram.
„Við verðum að gera eitthvað, annars verða komnir nýir leikmenn í okkar stað á næsta ári. Í fullri hreinskilni, með þennan mannskap og þau laun sem þeim eru greidd, 90 prósent af leikmannahópnum eru í heimsklassa, væri það hrikalegt áfall fyrir félagið ef það kæmist ekki áfram, og fyrir okkur líka,“ sagði Nasri á fréttamannafundi í gær.
Bayern er þegar komið áfram með 12 stig úr fjórum leikjum. Roma og CSKA Moskva eru með fjögur stig hvort og mætast í Moskvu. Sigurliðið þar kemst áfram í kvöld ef City nær ekki að vinna Bayern. Í lokaumferðinni þarf City svo að fara til Ítalíu og mætir Roma þar.