Bros mitt ætti að vera mun breiðara, er það ekki?

„Bros mitt ætti að vera mun breiðara, er það ekki? Þetta er mikill léttir, það er sú tilfinning sem er yfirþyrmandi þessa stundina. En við þurfum að byggja ofan á þessa frammistöðu,“ sagði Nigel Pearson, knattspyrnustjóri Leicester, eftir 1:0 sigurinn gegn Hull í dag.

„Við vitum að við höfum misst af allt of mörgum stigum. Í mörgum af þessum leikjum höfum við átt meira skilið en við áttum í dag,“ sagði Pearson.

Sigurinn var geysilega mikilvægur í ljósi þess að Leicester hafði einungis 10 stig á botni deildarinnar fyrir leikinn í dag, fimm stigum á eftir næstu liðum. Munurinn er einungis þrjú stig eftir leiki dagsins en næstu lið á undan eru Burnley, Crystal Palace og Hull sem öll hafa 16 stig.

„Steve Bruce [knattspyrnustjóri Hull] hefur eflaust þá tilfinningu að lið hans hefði unnið leikinn og við höfum fengið að kynnast þeirri stöðu nokkrum sinnum á þessari leiktíð. Við megum hins vegar ekki slaka á núna. Við sýndum vilja og ákveðni í að halda boltanum frá markinu í dag og við uppskárum eftir því,“ sagði Pearson.

Fylgst var með gangi mála í ENSKA BOLT­AN­UM Í BEINNI hér á mbl.is í allan dag.

• Blogga um frétt