Argentínska knattspyrnugoðsögnin Diego Maradona líkir Louis van Gaal knattspyrnustjóra Manchester United við djöful vegna þess hvernig hann hefur komið fram við kólumbíska framherjann Radamel Falcao.
Falcao, sem er í láni frá Mónakó, hefur verið úti í kuldanum hjá Van Gaal megnið af tímabilinu og var meira að segja skyldaður til að spila með varaliði félagsins einn leik.
Maradona er staddur í Kólumbíu þar sem hann tekur þátt í ágóðaleik og þar lét hann gamminn geysa.
„Van Gaal er ekki góður maður. Hann er líkari djöflinum en einhverju öðru,“ sagði Maradona, sem liggur sjaldnast á skoðunum sínum.
Líklegt er að Falcao verði enn að sætta sig við bekkjarsetu á morgun þegar Manchester United fær granna sína í Manchester City í heimsókn á Old Trafford.
<br/><br/>