Brendan Rodgers rekinn

Stórtíðindi voru að berast úr herbúðum Liverpool sem hefur ákveðið að reka knattspyrnustjóra sinn Brendan Rodgers. Liverpool situr í tíunda sæti deildarinnar með 12 stig eftir átta umferðir og það er árangur sem forráðamenn telja ekki nægilega góðan.

Norður-Írinn var ráðinn knattspyrnustjóri Liverpool í byrjun júní árið 2012 og tók við félaginu af Skotanum Kenny Daglish. 

Rodgers hefur ekki tekist að vinna titil á þremur árum sínum sem knattspyrnustjóri hjá félaginu. Besti árangur Rodgers í ensku úrvalsdeildinni er þegar Liverpool hafnaði í öðru sæti deildarinnar tímabilið 2013/2014.

Liverpool hafnaði í sjötta sæti ensku úrvalsdeildarinnar á síðastliðnu keppnistímabili með 62 stig og mistókst að tryggja sér sæti í Meistaradeild Evrópu. 

Þjóðverjinn Jürgen Klopp sem áður þjálfaði Borussia Dortmund hefur þráfaldlega verið orðaður við starfið undanfarnar vikur og þykir hann líklegur til að vera ráðinn knattspyrnustjóri Liverpool.

• Blogga um frétt