Rykið er vart farið að setjast eftir brottrekstur Brendan Rodgers frá Liverpool, en hann er nú þegar orðaður við önnur félög.
Veðbankar í Englandi hafa sett Rodgers efstan á lista sem næsti knattspyrnustjóri Newcastle United, en það hefur hvorki gengið né rekið hjá þeim svarthvítu og eru þeir án sigurs á botni úrvalsdeildarinnar.
Rodgers er einnig kominn á lista yfir mögulega knattspyrnustjóra Sunderland, sem er án þjálfara, og Aston Villa. Rodgers er með 44,48% sigurhlutfall í þeim 317 leikjum sem hann hefur stjórnað Watford, Reading, Swansea og Liverpool.
Ekki þyrfti Rodgers þó að leita sér að nýju starfi til að eiga fyrir salti í grautinn, en enska blaðið Telegraph greinir frá því að Rodgers fái greiddar 7 milljónir punda þar sem hann var samningsbundinn Liverpool. Sú upphæð jafngildir rúmlega 1,3 milljörðum íslenskra króna.