Landsliðsmennirnir Aron Einar Gunnarsson og Gylfi Þór Sigurðsson léku hvorugir með liðum sínum þegar lið þeirra, Cardiff og Swansea, féllu úr leik í þriðju umferð ensku bikarkeppninnar í dag. Cardiff tapaði fyrir Shrewsbury og Swansea beið lægri hlut gegn Oxford.
Gylfi Þór Sigurðsson var ekki í leikmannhópi Swansea sem laut í lægra haldi gegn Oxford á Kassam Stadium, heimavelli Oxford.
Chelsea fór áfram í fjórðu umferð með því að leggja Scunthorpe að velli með tveimur mörkum gegn engu. Carlisle og Yeovil þurfa að mætast á nýjan leik þar sem liðin gerðu 2:2 jafntefli.
Diego Costa skoraði fyrra mark Chelsea í upphafi leiksins og Ruben Loftus-Cheek bætti við öðru marki Chelsea um miðjan seinni hálfleikinn.
Guus Hiddink er enn taplaus sem knattspyrnustjóri Chelsea, í ensku bikarkeppninni, en Hollendingurinn stýrði liðinu til sigurs í keppninni árið 2009.
Tottenham og Leicester þurfa að mætast á nýjan leik, en liðin gerðu 2:2 jafntefli á White Hart Lane, heimavelli Tottenham í dag .
Christian Eriksen og Harry Kane skoruðu mörk Tottenham og Marcin Wasilewski og Shinji Okazaki svöruðu fyrir Leicester.
Aron Einar Gunnarsson sat allan tímann á varamannabekk Cardiff þegar liðið laut i gras gegn Shrewsbury með einu marki gegn engu á heimavelli sínum, Cardiff City Stadium, í síðasta leik dagsins.
Úrslit í leikjum dagsins