Pato færist nær Chelsea

Alexandre Pato í leik með brasilíska landsliðinu.
Alexandre Pato í leik með brasilíska landsliðinu. AFP

Alexandre Pato, framherji Corinthians í Brasilíu, færist nær enska úrvalsdeildarfélaginu Chelsea, en þjálfari hans gaf vísbendingu um það á blaðamannafundi í dag.

Mörg félög í ensku úrvalsdeildinni hafa sýnt Pato áhuga en Independent og ESPN Brasil greindu þó frá því í gær að Chelsea væri líklegast til þess að hreppa sóknarmanninn öfluga.

Chelsea hefur verið í viðræðum við Corinthians undanfarna daga og er nú líklegt að hann semji við félagið á allra næstu dögum.

„Eftir svona 2-3 daga þá komist þið blaðamennirnir að því hvað gerist hjá Pato. Þið þurfið ekkert svar frá mér,“ sagði Tite, þjálfari Corinthians.

mbl.is