Ronaldo: Rashford minnir á mig

Brasilíska knattspyrnugoðið Ronaldo, einn besti framherji sögunnar, segir að hinn 18 ára gamli Marcus Rashford, framherji Manchester United, eigi afar bjarta framtíð fyrir sér.

Rashford fékk sæti í aðalliði United á þessu ári og hefur slegið í gegn, og skorað sjö mörk í 15 leikjum. Sumir hafa gengið svo langt að segja Rashford verðskulda sæti í enska landsliðshópnum sem fer á EM í Frakklandi í sumar.

Ronaldo, sem 20 ára gamall skoraði 34 mörk í 37 leikjum fyrir Barcelona, er hrifinn af Englendingnum unga:

„Hann er mjög góður, ungur leikmaður. Ég sé sjálfan mig í honum að vissu leyti. Hann er hugrakkur, fljótur og mjög góður með boltann,“ sagði Ronaldo við The Sun.

„Framherjar verða að vera hungraðir í að skora og ég sé að hann hefur þetta hungur. Hann á ótrúlega framtíð fyrir sér,“ sagði Ronaldo.

• Blogga um frétt