„Það hefur verið sannur heiður að vera knattspyrnustjóri hjá jafnfrábæru liði og Manchester United og með því hef ég svalað metnaði mínum,“ sagði fyrrverandi knattspyrnustjóri Manchester United, Louis van Gaal, í yfirlýsingu sem hann sendi frá sér nú í kvöld.
Manchester United sagði Van Gaal upp störfum í dag en undir hans stjórn varð liðið enskur bikarmeistari á laugardaginn.
„Ég er gríðarlega stoltur af því að hafa hjálpað United að vinna ensku bikarkeppnina í tólfta skipti í sögunni. Ég hef unnið marga titla en það er sérstakt að vinna svona merkilega keppni, eins og enska bikarkeppnin er. Þetta er því eitt mesta afrek á mínum þjálfaraferli,“ sagði van Gaal enn fremur. Hann sagðist þó vera vonsvikinn með endalok sín hjá United:
„Ég er gríðarlega vonsvikinn með að fá ekki að klára áætlað þriggja ára plan. Ég hef trú á því að grunnurinn til að ná frábærum árangri sé til staðar og vonandi var sigurinn í bikarkeppninni eingöngu stökkpallur fyrir næsta tímabil.“
Að lokum sagði Hollendingurinn að tíminn hjá United hafi verið skemmtilegur. „Ég vil þakka leikmönnunum fyrir samvinnuna og óska þeim alls hins besta í framtíðinni. Einnig vil ég þakka stjórninni fyrir að gefa mér tækifærið til að stýra þessu frábæra liði.“