Frakkinn Claude Puel hefur verið ráðinn knattspyrnustjóri enska félagsins Southampton. Hann tekur við af Hollendingnum Ronald Koeman sem yfirgaf Southampton á dögunum og tók við Everton.
Puel skrifaði undir þriggja ára samning við suðurstrandarliðið sem hafnaði í 7. sæti ensku úrvalsdeildarinnar á nýafstöðnu keppnistímabili.
Puel, sem er 54 ára gamall, hefur þjálfað Nice í frönsku 1. deildinni undanfarin fjögur ár. Áður hafði hann stýrt Monaco, Lille og Lyon í heimalandinu.