Claudio Bravo, markvörður Barcelona, er væntanlegur til Manchester á fimmtudaginn kemur, þar sem hann mun skrifa undir samning við Manchester City. Þetta kemur fram í frétt SkySports í dag.
Þessar fregnir ýta undir sögusagnir um brottför Joe Hart frá Manchester City, en samkvæmt breskum fjölmiðlum er Everton áhugasamt um krafta enska landsliðsmarkvarðarins.
Greint var frá því í gær að Barcelona hefði komist að samkomulagi við Ajax um kaup á hollenska landsliðsmarkverðinum Jasper Cillessen og samningaviðræður um kaup og kjör stæðu yfir þessa dagana.