Góðar eða slæmar fréttir?

Brasiliski miðjumaðurinn Philippe Coutinho fær að vita örlög sín í dag en hann meiddist á ökkla er Liverpool lék gegn Sunderland í ensku úrvalsdeildinni í knattspyrnu um helgina. Hann gæti verið lengi frá.

Coutinho meiddist á ökkla í fyrri hálfleik og þurfti að fara af velli en óvíst er hversu lengi hann verður frá.

Hann hefur verið lykilmaður í liði Liverpool síðustu tvö ár eða svo og því ljóst að það yrði mikil blóðtaka ef hann fær slæmar fréttir í dag.

Enskir fjölmiðlar túlka Instagram-færsluna sem hann setti inn í dag á þann hátt að Coutinho sé í raun að undirbúa sig fyrir slæmu fréttirnar.

„Ég vil þakka stuðningsmönnunum, vinum mínum og fjölskyldu fyrir öll þau hlýju skilaboð sem ég hef fengið. Ég met það mikils,“ sagði Coutinho.

• Blogga um frétt