Pep Guardiola, knattspyrnustjóri Manchester City, baðst afsökunar á framferði sinna manna undir lok leiksins gegn Chelsea í ensku úrvalsdeildinni í knattspyrnu í dag en tveir leikmanna hans fengu að líta rauða spjaldið á lokamínútum leiksins.
Eftir að Sergio Agüero framherji City gerði sig sekan um fólskulegt brot á David Luiz sauð allt upp úr. Agüero var réttilega vísað af velli fyrir brotið á Luiz og Fernandinho fauk einnig út af eftir að hafa tekið hressilega á Cesc Fábregas.
„Það er leiðinlegt þegar leikur endar á þennan hátt. Það fellur mér ekki í geð og ég biðst afsökunar á því sem gerðist,“ sagði Guardiola eftir leikinn.
Agüero á yfir höfði sér fjögurra leikja bann þar sem þetta er í annað sinn á leiktíðinni sem honum er vísað af velli og Fernadinho fer í þriggja leikja bann en City varð að sætta sig við 1:3 tap fyrir Chelsea í toppslag deildarinnar.
„Við unnum ekki leikinn vegna þess að við fórum illa með færin ekki út af ákvörðun dómarans,“ sagði Guardiola.