Armenski landsliðsmaðurinn Henrikh Mkhitaryan skoraði sitt fyrsta mark fyrir enska stórliðið Manchester United í 2:0 sigri á Zorya í lokaumferðinni í riðlakeppni Evrópudeildarinnar í knattspyrnu í kvöld.
Mkhitaryan kom til United frá Dortmund í sumar en tók þó sinn tíma í að finna sig hjá félaginu, sérstaklega eftir leik liðsins gegn Manchester City en þá var honum skipt af velli í hálfleik og var þá ekki í náðinni hjá José Mourinho, knattspyrnustjóra félagsins, í næstu leikjum.
Hann hefur þó verið frábær í síðustu leikjum og í kvöld skoraði hann svo fyrsta mark sitt fyrir félagið en það kom í byrjun síðari hálfleiks. Hann vonast nú til þess að skora á Old Trafford, heimavelli United.
„Ég hef beðið lengi eftir þessu marki en næsta mark mitt verður á Old Trafford. Ég vil skora á heimavelli,“ sagði Mkhitaryan.