Vill hjálpa Gerrard í stjórastólinn

Jürgen Klopp, knattspyrnustjóri Liverpool, segist vilja hjálpa Steven Gerrard í vegferð sinni að verða knattspyrnustjóri.

Gerrard mun snúa aftur til Liverpool í næsta mánuði og starfa í akademíu félagsins, en hans langtímamarkmið er að verða knattspyrnustjóri. Klopp segist mjög spenntur fyrir endurkomu hans.

„Hann vill verða knattspyrnustjóri í framtíðinni og það er flott. Hann verður að vita hvað hann vill, því það að vera stjóri er starf sem þú þarft að læra og hann er á góðri vegferð með það,“ sagði Klopp.

„Með hans reynslu sem leikmaður ofan á það sem hann þarf að læra er framtíðin björt hjá honum. Allir vita hjá Liverpool að hann er frábær náungi og þetta eru stórgóðar fréttir fyrir knattspyrnuna,“ sagði Klopp.

• Blogga um frétt