Wayne Shaw, varamarkvörður enska utandeildaliðsins Sutton United, er hættur eftir uppákomuna sem átti sér stað í leik Sutton og Arsenal í bikarkeppninni í gærkvöld.
Shaw, sem er 45 ára gamall og vegur 127 kíló, mun sæta rannsókn þess efnis að hann hafi brotið gegn veðmálareglum enska knattspyrnusambandsins en Shaw fékk sér böku (pie) á bekknum þegar seint var liðið á leikinn. Er hann talinn hafa vitað af því að veðjað var á að hann myndi fá sér bita af böku á bekknum.
Sjá frétt mbl.is: Hörð refsing fyrir bökuátið á bekknum?
Enskir fjölmiðlar greina frá því að stjórnendur Sutton United hafi farið þess á leit við Shaw að hann hætti og varð hann við beiðni þeirra.
„Ég er án samnings núna svo ég er opinn fyrir tilboðum. Kína er í kortunum og Ameríka líka en hins vegar bíð ég eftir tilboði frá Sky Sports, skrifar Shaw á Twitter-síðu sína.