Antonio Conte, knattspyrnustjóri Chelsea, kveðst ekki vera fullviss um að Eden Hazard, framherji liðsins, verði áfram í herbúðum félagsins á næsta keppnistímabili. Hazard hefur skorað 15 mörk fyrir Chelsea á yfirstandandi leiktíð, en hann hefur verið orðaður við Real Madrid undanfarið.
„Það er ómögulegt fyrir mig að slá því föstu að Hazard verði leikmaður Chelsea á næstu leiktíð. Það á ekki bara við um Hazard heldur alla leikmenn liðsins. Það er stjórn félagsins sem tekur lokaákvörðun í svona málum og ég get bara sagt mína skoðun á málinu,“ sagði Conte á blaðamannafundi í gær.
„Ég vil að sjálfsögðu halda Hazard og ég tel að félagið sé ekki á þeim buxunum að selja hann. Stefnan er sett á að halda lykilleikmönnum liðsins og styrkja liðið í sumar. Ég held að Hazard sé ánægður hjá Chelsea, en maður veit hins vegar aldrei hvað gerist í fótboltanum,“ sagði Conte enn fremur.