Jürgen Klopp, knattspyrnustjóri Liverpool, segist hafa áhyggjur af meiðslum senegalska landsliðsmannsins Sadio Mané.
Meiðsli sem hafa verið að angra Mané aftan í læri tóku sig upp á nýjan leik í leik Sengal og S-Afríku á föstudaginn þegar Senagalar tryggðu sér farseðilinn á HM. Mané er á leið til Englands þar sem sjúkraþjálfarar Liverpool munu meta meiðsli leikmannsins en hann tók þátt í 4:1 sigri Liverpool gegn West Ham 4. þessa mánaðar eftir að hafa misst af fimm leikjum í röð vegna meiðslanna aftan í lærinu.
„Það veldur mér auðvitað áhyggjum að hann sé aftur að finna fyrir meiðslum aftan í lærinu. Við erum ekki búnir að hitta hann enn þá og kanna meiðsli hans til hlítar en það verður gert um leið og hann kemur,“ segir Klopp en Liverpool tekur á móti Southampton í ensku úrvalsdeildinni á laugardaginn og sækir svo Sevilla heim í afar mikilvægum leik í Meistaradeildinni þremur dögum síðar.