José Mourinho, knattspyrnustjóri Manchester United, hefur staðfest að þeir Phil Jones og Eric Bailly verði fjarri góðu gamni vegna meiðsla gegn Brighton í ensku úrvalsdeildinni á morgun. Þá staðfesti hann að Paul Pogba muni byrja leikinn, en geti þó ekki spilað í 90 mínútur.
Zlatan Ibrahimovic er snúinn aftur eftir meiðsli og Mourinho hrósaði honum á fréttamannafundi í dag.
„Hann er alltaf til staðar og alltaf jákvæður, hann hefur mjög góð áhrif á liðið. Það skiptir ekki máli hvort hann sé að spila eða ekki, og það er ekki síður mikilvægt. Hann er annar kostur fyrir okkur í framlínunni og það er ómögulegt að [Romelu] Lukaku spili alla leiki, svo við þörfnumst hans. En hann þarf tíma. Við höfum gefið honum 15-20 mínútur í tveimur leikjum og hann þarf meira af því,“ sagði Mourinho.
United er í öðru sæti fyrir 13. umferð deildarinnar, átta stigum á eftir Manchester City, en Brighton er í 9. sætinu.
„Brighton er gott lið, það er erfitt að brjóta það á bak aftur enda fær liðið fá mörk á sig,“ sagði Mourinho.