Enska knattspyrnusambandið hefur hafið rannsókn á ólátunum sem brutust út á Old Trafford eftir leik Manchester-liðanna City og United í ensku úrvalsdeildinni í gær.
José Mourinho, knattspyrnustjóri Manchester United, er sagður hafi fengið yfir sig bæði vatn og mjólk í leikmannagöngunum eftir leik en hann hafði þá rifist heiftarlega við nokkra leikmenn City. Auk þess sem Mourinho var holdvotur mun Mikel Arteta, sem er í þjálfarateymi City, hafa verið blóðugur í framan eftir átökin eftir leikinn.
Michael Oliver, dómari leiksins, minntist ekkert á atburðina eftir leik í skýrslu sinni eftir viðureignina, en knattspyrnusambandið hefur krafist svara frá félögunum. Þau hafa til miðvikudags til þess að útskýra hvað gekk á.