Unnið við bíl Kristjáns Einars í bílskúr TripleX-liðsins. mbl.is/toyota

Kristján Einar Kristjánsson stóð sig vel í tímatökum fyrsta kappaksturs hans í Toyota-formúlunni sem fram fer í Nýja-Sjálandi. Bætti hann tíma sinn mjög í seinni tímatökunni og hefja tveir keppendur seinni kappakstur morgundagsins á eftir honum, þar á meðal meistari lafði Wigram-mótanna.

Kristján Einar náði sér mun betur upp í seinni tímatökunni. Í þeirri fyrri varð hann í 18. og neðsta sæti og 2,3 sekúndum frá tíma þess fyrsta. Hefur því fyrri keppni morgundagsins í því sæti, en mótið fer fram í Ruapuna, skammt frá borginni Christchurch.

Seinni kappaksturinn hefur hann hins vegar í 16. sæti. Í seinni tímatökunni ók hann hringinn 0,7 sekúndum hraðar en í fyrra tilvikinu og var aðeins 1,9 sek. frá besta tíma, sem teljast verður gott í fyrstu formúlukeppni hans. Í seinni umferðinni var hann og fljótari að setja sinn besta tíma, eða á sjöunda hring en á þeim tíunda í fyrri umferðinni.

Í þriðja kappakstrinum, keppninni um lagði Wigram styttuna, ræsir Kristján Einar einnig í 16. sæti þar sem fyrir það mót gildir meðaltími úr tímatökunum tveimur.

Bílarnir nota eldsneyti sem unnið er úr mysu

Hörð keppni var um efstu sæti í tímatökunum báðum en hraðast ók einn yngsti keppandinn, heimamaður að nafni Earl Bamber. Meistari raðarinnar, Daniel Gaunt, var dæmdur úr leik í seinni umferðinni fyrir að vera á of léttum bíl. Hann mun hefja keppni beint fyrir aftan Kristján Einar í öðru og þriðja mótinu.

Það er athyglisvert við Toyota-formúluna í ár að hún telst vistvæn þar sem bílarnir eru knúnir lífrænu E85-eldsneyti sem unnið er úr mysu. Með móti helgarinnar hefst akstursíþróttasumarið hjá andfætlingum okkar á Nýja-Sjálandi. Eftir mótið við Christchurch leggja ökumennirnir leið sína til Norður Palmerston og keppa þar um næstu helgi. Þriðja keppnishelgin í röð fer svo fram í bænum Taupo.