Kristján Einar í návígi í Taupo sl. nótt.

Lokamótið var til minningar um nýsjálenska ökuþórinn Denny Hulme  og fór fram á Taupo brautinni. Vegna óhapps í tímatökum föstudag ræsti Kristján Einar 18. og aftastur. Það dró ekki úr honum kjark því hann sótti vel og vann sig upp jafnt og þétt fram á við.

Hann endaði í 13. sæti og var 29:15,387 mínútur með hringina 20, sem hver um sig er 3.330 metrar. Munaði því um 1,6 sekúndu á hring að meðaltali á milli Kristjáns Einars og efsta manns.

Kristján Einar sagði eftir keppnina í nótt að hann væri nokkuð sáttur með að hafa unnið sig upp um fleiri sæti en í fyrri keppnum mótsins. „Hins vegar voru það vonbrigði að þurfa að byrja aftast því keppnin er svo jöfn og bílarnir aka mjög þétt í brautinni.

En keppnin var góð. Og það var ákveðið skref á ferlinum að keyra fyrir framan meira en hundrað þúsund manns og upplifa þá umfangsmiklu starfsemi sem fylgir A1GP-alþjóðakeppninni sem fram fór samhliða TRS-mótunum í brautinni um helgina.

Eins og undanfarnar helgar var keppnin gríðarlega hörð og þrátt fyrir nærri hálftíma langan kappakstur komu sjö efstu bílar í mark á sömu sekúndunni.

Það er einnig til marks um hve jafnt er á með keppendum, setti Mann Halliday nýtt brautarmet í keppni tvö í gær sem var svo slegið af Dominic Storey í dag. Storey setti hraðasta hring í keppninni, 1:24,927 mín., en hann kom þrátt fyrir það síðastur keppenda í mark á heildartímanum 29:09,835 mínútum,“ sagði Kristján Einar.