Kristján Einar ásamt bakhjarli sínum, Róbert Wessman frá SALT Investments, og systkynunum Jens Hilmari og Helenu sem afhjúpuðu bílinn. mbl.is/Guðni Þorbjörnsson

Kristján Einar Kristjánsson hefur á morgun æfingar í Oulton Park-brautinni í Englandi, en þar fer fyrsti kappakstur ársins í hinni bresku formúlu-3 fram um helgina. Hann fékk á dögunum afhent skírteini til formúlukeppni og sýndi bíl sinn í endanlegu útliti.

„Ég er verulega stoltur af þessu,“ sagði Kristján Einar þegar Garðar Gunnarsson, formaður Landssambands íslenskra akstursíþrótta (LIA) afhenti honum formlega alþjóðlegt keppnisskírteini.

Garðar kvað við það tækifæri áfangann merkilegan fyrir LÍA því Kristján Einar væri sá fyrsti sem íslenskt mótorsport hefði alið af sér til að hljóta alþjóðlegt keppnisskírteini til formúlukappaksturs af þessari gráðu.

Áður hefur sambandið gefið út skírteini fyrir Viktor Þór Jensen til formúlukappakstursins. 

Um leið og Kristján Einar fékk skírteinið kom í ljós hvernig útlit keppnisbíls hans verður. Er hann svartur og silfraður en með hvítri trjónu.

Sem fyrr segir fer fyrsta mótið fram um helgina en Kristján Einar keppir í landsflokki hinnar bresku formúlu-3. Æfingar fara fram á morgun, föstudag, tímatökur á laugardaginn og keppendur frá svo frí á páskadag en reyna síðan með sér tvisvar á mánudeginum, annan í páskum.

Garðar Gunnarsson afhendir Kristáni Einar alþjóðlega keppnisskírteinið. mbl.is/Guðni Þorbjörnsson