Kristján Einar gerir sig klárann til keppni Oulton Park í dag.

Kristján Einar Kristjánsson hefur lokið sinni fyrstu keppnishelgi í formúlu-3 í Bretlandi. Í seinna mótinu síðdegis varð hann í sjötta sæti í sínum flokki en í fimmta í hinu fyrra.  

Frumraun Kristján Einars átti sér stað í Oulton Park brautinni skammt frá Manchester í Englandi. Seinni umferðin fór fram við mun hagstæðari veðurskilyrði og í þurri braut, enda jókst meðalhraði bílanna til muna, og það þrátt fyrir að öryggisbíll væri kallaður út í brautina um tíma. Var hann 161 km/klst hjá Kristjáni Einari.

Kristján Einar sýndi yfirvegun og öryggi í þessum fyrsta kappakstri og háði mikla keppni við sér mun reyndari menn. Lið hans Carlin fagnar góðum árangri í dag, því ökuþórar þess unnu bæði alþjóðaflokkinn og landsflokkinn í báðum mótunum.

Keppendur í bæði alþjóðaflokknum og landsflokknum keppa saman þótt um sjálfstæða flokka og misjafnlega öfluga bíla sé að ræða. Í seinna mótinu kom Kristján Einar númer 21 í mark af öllum hópnum, eða sæti framar en í fyrri kappakstrinum, sem fram fór  í morgun.