Viktor Þór frumekur formúlu-3 bíl sínum í Croft í gær.

Tímamót verða í sögu íslenskra akstursíþrótta um helgina er Viktor Þór Jensen og Kristján Einar Einarsson keppa í bresku formúlu-3 móti sem fram fer í Croft á Englandi. Er þetta í fyrsta sinn sem tveir íslenskir  ökumenn taka þátt í sama formúlukappakstri.

Viktor Þór ók í fyrsta sinn í gær en hann hefur misst af öllum æfingum til þessa og fyrstu kappaksturshelginni. Því notaði hann tímann fyrst og fremst til að átta sig á bílnum nýja. Á fyrri æfingunni var hann lengst hinna 19 keppenda í alþjóðaflokki með hringinn en á seinni æfingunni hafði hann einn ökumann fyrir aftan.

Kristján Einar setti áttunda besta tíma níu keppenda í landsflokki á fyrri æfingunni. Á þeirri seinni gerði hann enn betur, varð þá þriðji í landsflokki og sem meira er; ók hraðar en Viktor Þór sem er þó á öflugri bíl í alþjóðaflokknum.

Alvarleg bilun varð í bremsukerfi bíls Kristján Einars á fyrri æfingunni. Varð að skipta alveg um það milli æfinga. 

Úrkoma var og væta á brautunum á seinni æfingunni sem háði ökuþórunum. Skautuðu þeir margir í brautinni og runnu hvað eftir annað út fyrir braut. Á endanum var æfingin stöðvuð vegna vætunnar.

Kristján Einar Einarsson á ferð í fyrsta formúlu-3 mótinu, í Oulton Park.