Frá upphafi fyrri kappakstursins í Croft í dag. Vætustrókar standa aftur úr bílunum. mbl.is/fota

Kristján Einar Kristjánsson varð fimmti í sínum flokki af níu keppendum í fyrri formúlu-3 kappakstrinum sem fram fór í Croft-brautinni á Englandi í dag. Viktor Þór Jensen varð 14. í alþjóðaflokki af 20 ökuþórum.

Væta var á brautunum er kappaksturinn fór fram í Croft og sigurvegari varð  mexíkanskur ökumaður, Sergio Perez. 

Keppt er sameiginlega í báðum flokkum og varð Viktor Þór 17. í mark, mínútu á eftir fyrsta manni. Kristján Einar varð 20. í heildina.  

Kristjáni tókst ekki upp sem skyldi í tímatökum í gær og hóf keppni í sjöunda sæti í landsflokknum. Hann vann sig fram úr tveimur bílum og það lyfti honum úr sjötta sæti í það fjórða í stigakeppni ökumanna. Er hann með 22 stig og næsti maður ofan við hann er með 28 stig í þriðja sæti.

Snemma í keppninni ók liðsfélagi Kristjáns Einars, Oliver Turvey, sem keppir í alþjóðaflokknum í hliðina á honum. Þótt samstuðið hafi ekki verið alvarlegt var það nóg til að skekkja hægra afturdekkið á bíl Kristjáns Einars þannig að það festist hægt og sígandi það sem eftir var keppninnar.

„Ég áttaði mig ekki á því hvað var að en fann að bíllinn var ekki að hlýða mér eins og hann á að gera,“ sagði Kristján Einar. „Það var ekki fyrr en mínir menn tóku hann í sundur eftir keppni að það kom í ljós hvað var að. En það er búið að laga og núna bíð ég bara eftir að komast í seinni keppnina.“