Viktor Þór bíður í rigningunni áður en tímatökum var aflýst. fota

Aflýsa varð síðdegis fyrri tímatökum formúlu-3 mótanna sem fram fara í Monza á Ítalíu um helgina vegna úrhellis. Gildir því tímataka morgundagsins, sem átti einungis að vera fyrir seinni kappaksturinn, fyrir bæði mótin.

Tímatakan var stöðvuð eftir aðeins sex mínútur er einn ökumannanna flaug út úr brautinni á sínum öðrum hring. Þá höfðu 14 ökumenn af 27 sett tíma en liðsstjórarnir urðu sammála um að þeir myndu ekki gilda og tímataka morgundagsins yrði látin gilda fyrir báðar keppnir helgarinnar.

Keppendur biðu undir regnhlífum í hálftíma eftir því hvort hægt væri að hefja leik á ný en dómarar keppninnar ákváðu að of mikil áhætta væri að halda áfram vegna bleytunnar.

Besti tími hvers ökuþórs í tímatökunni á morgun mun gilda fyrir rásröð fyrri keppninnar og næstbesti tími ákvarðar rásröð kappaksturs sunnudagsins.

Viktor Þór Jensen og Kristján Einar Kristjánsson keppa í Monza um helgina. Í dag fóru þar fram tvær æfingar áður en rigningin setti strik í reikninginn.

Á fyrri æfingunni setti Viktor Þór 20. besta tímann og Kristján Einar þann 25. besta. Viktor varð 17. af 19 í alþjóðaflokknum á 1:49,079 mín., en Kristján fimmti af sjö í landsflokki á 1:49,874 mín.  

Á seinni æfingunni setti Viktor 19. besta tíma dagsins (1:48,175)  af 27 en Kristján þann 24. besta. Setti Kristján fjórða besta tímann (1:49,428)  í landsflokknum af sjö. Viktor setti hins vegar 16. besta tímann af 20 í alþjóðaflokknum.  Minnkaði hann bilið í fremsta mann úr rúmum 2,4 sekúndum á fyrri æfingunni í rúma 1,7 á þeirri seinni.

Meðal ökumanna í dag voru tveir Ítalir sem keppa sem gestir.

Kristján Einar í Monza í dag. fota

Bið keppenda eftir því að halda áfram í Monza í dag var til einskis vegna vætunnar. fota