Kristján Einar seigur í tímatökunum í Monza
Kristján Einar klár til keppni.
Kristján Einar Kristjánsson stóð sig vel í tímatökum fyrir formúlu-3 mótin tvö sem fram fara í Monza á Ítalíu í dag og á morgun. Fyrri kappaksturinn hefur hann þriðji í landsflokki og seinni kappaksturinn, á morgun, í öðru sæti.
Fresta þurfti tímatökunum þar til í dag vegna úrhellis í gær. Það rigndi enn í morgun, en aðstæður voru þó mun betri. „Ég sá að minnsta kosti nefið á bílnum mínum sem ég gerði ekki þegar tímatakan hófst í gær,“ sagði Kristján Einar.
Hann náði þriðja besta tíma í tímatökum fyrir fyrri keppni helgarinnar og ræsir því þriðji í landsflokk formúlu 3. Hann verður sætinu framar í seinni kappakstrinum, eða annar, en næstbesti hringur hvers ökumanns réð röð á rásmarki seinni kappakstursins.
Tímatakan fór að nokkru leyti forgörðum hjæa Viktor Þór Jensen. Hann varð fyrir því að bensíngjöfin festist í botni á fjórða hring og kom því inn á viðgerðarsvæðið. Aðstoðarmenn hans löguðu bilunina en stuttu eftir að hann fór aftur út í brautina fór allt á sama veg aftur.
Af þessum sökum varð næstbesti hringur hans mun slakari og hefur hann seinni kappaksturinn því af 26. rásstað af 28. Kristján Einar verður á 20. rásstað.
Eini góði hringur Viktors Þórs var hálfri sekúndu betri en besti hringur Kristján Einars. Hann hefur fyrri kappaksturinn í 17. sæti í alþjóðaflokknum en af 19 rásstað þar sem einn bíll úr landsflokki og ítalskur gestur urðu á undan. Kristján Einar leggur af stað þremur sætum aftar, eða af 22. rásstað, en keppt er samtímis í báðum flokkum.
