Viktor Þór í keppni í alþjóðaflokki formúlu-3. mbl.is/fota

Viktor Þór Jensen varð tíundi í alþjóðaflokki formúlu-3 kappakstursins  sem fram fór í Monza á Ítalíu í dag, en alls luku 16 keppni. Tólf ökumenn skiluðu sér ekki í mark og meðal þeirra var Kristján Einar Kristjánsson.

Með frammistöðu sinni vann Viktor Þór sín fyrstu stig en hann missti af tveimur fyrstu mótunum og hlaut engin stig í næstu tveimur, enda að aka nýjum bíl sínum þá í fyrsta sinn.  

Árangur Viktors Þórs verður að teljast góður því hann hóf keppni í 17. sæti. Bíll hans var honum erfiður í tímatökunum þar sem  sem bensíngjöfin festist í botni á fjórða hring. Hann kom því inn á viðgerðarsvæði og gert var við en stuttu eftir að hann kom aftur út í tímatökuna fór allt á sama veg.

„Þetta voru gífurleg vonbrigði, en það þýðir ekkert að velta sér upp úr því. Þessi niðurstaða gerir keppnina á morgun bara ennþá mikilvægari. Þá verð ég annar á rásmarki í landsflokknum og ég verð að einbeita mér að ná góðu starti og komast klakklaust í gegnum fyrstu beygjuna,“ sagði Kristján Einar eftir keppnina á Monza í dag.

Hann tók af stað þriðji í landsflokknum og tókst að sneiða hjá árekstri sem varð í fyrstu beygju eftir ræsingu. Vel gekk hjá honum  þar til í fimmta hring er gírkassinn bilaði svo keppninni var sjálfhætt.

Kappaksturinn vann Mexíkómaður að nafni Sergio Perez en það gerði hann með glæsibrag því hann hóf keppni í 14. sæti. Sá er varð annar, Nýsjálendingur að nafni Brendon Hartley, hóf keppni af 13. rásstað. 

Undir bílum keppenda voru slétt dekk í fyrsta sinn frá því á æfingunum í gær.