Ferraribílarnir verða á fremstu rásröð kappakstursins í Mónakó og McLarenbílarnir þar fyrir aftan eftir rimmu um ráspólinn sem var að ljúka rétt í þessu. Felipe Massa varð hlutskarpastur og Kimi Räikkönen varð annar.

Með þessu einokar Ferrari fremstu rásröð eins og liðið hefur þegar gert í mörgum mótum ársins. Sem er athyglisvert þar sem McLarenbílarnir  virtust hraðskreiðari á öllum þremur æfingunum í Mónakó, fram að tímatökunum.

 Röð fremstu manna breyttist ört á lokamínútum tímatökunnar en á endanum varð Lewis Hamilton hjá McLaren þriðji og liðsfélagi hans Heikki Kovalainen fjórði.

Räikkönen virtist kominn með pólinn á lokasekúndum þar sem hvorum McLarenþórnum tókst að svara góðum lokahring hans. Massa, sigurvegari síðasta kappaksturs, var þó enn í brautinni og sló félaga sínum við.

Massa setti besta tímann í öllum tímatökulotunum þremur. McLarenbílarnir voru hraðskreiðari Ferrarifákunum á fyrsta tímakafla brautarinnar en Ferrari var fljótari á öðru tímasvæðinu sem er lang lengst.

Robert Kubica á BMW varð fimmti og Nico Rosberg sýndi að hraði hans alla helgina var engin tilviljun því hann krækti í sjötta sætið.

Fernando Alonso á Renault virtist í erfiðleikum í fyrstu og annarri lotu. Kvartaði þá undan slöku veggripi en tryggði sig á endanum inn í lokalotuna og varð þar sjöundi. Hann var  eini ökumaðurinn sem notaði harðari dekkin í lokalotunni, aðrir settu traust sitt á þau mýkri.

Þvert á spár varð aðeins eitt óhapp í tímatökunum er David Coulthard ók út fyrir bestu aksturslínu á útleið úr veggöngunum með þeim afleiðingum að bíllinn lyftist og missti rásfestu. Skall hann utan í vegg og slitnuðu dekkin frá en bíllinn nam svo staðar í hjágötu.

Niðrustaða tímatökunnar varð annars sem hér segir:

Röð	Ökuþór	Bíll	Lota 1	Lota 2	Lota 3.
1.	Massa	Ferrari	1:15.190	1:15.110	1:15.787
2.	Räikkönen	Ferrari	1:15.717	1:15.404	1:15.815
3.	Hamilton	McLaren	1:15.582	1:15.322	1:15.839
4.	Kovalainen	McLaren	1:15.295	1:15.389	1:16.165
5.	Kubica	BMW	1:15.977	1:15.483	1:16.171
6.	Rosberg	Williams	1:15.935	1:15.287	1:16.548
7.	Alonso	Renault	1:16.646	1:15.827	1:16.852
8.	Trulli	Toyota	1:16.306	1:15.598	1:17.203
9.	Webber	Red Bull	1:16.074	1:15.745	1:17.343
10.	Coulthard	Red Bull	1:16.086	1:15.839	Engin tími
11.	Glock	Toyota	1:16.285	1:15.907
12.	Button	Honda	1:16.259	1:16.101
13.	Heidfeld	BMW	1:16.650	1:16.455
14.	Nakajima	Williams	1:16.756	1:16.479
15.	Barrichello	Honda	1:16.208	1:16.537
16.	Bourdais	Toro Rosso	1:16.806
17.	Piquet	Renault	1:16.933
18.	Vettel	Toro Rosso	1:16.955
19.	Sutil	Force India	1:17.225
20.	Fisichella	Force India	1:17.823