Viktor Þór á ferð í Rockingham. mbl.is/jamesbearne.com

Viktor Þór Jensen og Kristjáni Einari Kristjánssyni gekk betur í seinni kappakstrinum í formúlu-3 nú síðdegis í Rockingham-brautinni í Englandi. Viktor Þór varð fimmtándi af 18 keppendum í alþjóðaflokki og Kristján Einar fimmti af af níu í landsflokki.

Þeir hófu keppni hlið við hlið á níundu rásröð, Kristján á 17. rásstað en Viktor á þeim 18. Sá síðarnefndi ók 18. yfir marklínuna og Kristján 4 sekúndum og sex sekúndubrotum seinna en tveimur sætum aftar.

Keppendur í báðum flokkum, alls 27, keppa saman þótt um sjálfstæða keppni sé að ræða í hvorum flokki. Rigning var allan tímann sem kappaksturinn fór fram. 

Í fyrri kappakstri dagsins varð Viktor Þór 17. í sínum flokki eða tveimur sætum aftar en nú. Þá varð hann rúmum hring á eftir fyrsta manni en lauk keppni í seinna mótinu á sama hring og sigurvegarinn. Kristján Einar féll úr leik eftir einn hring í fyrra mótinu.

Sænskur ökuþór að nafni Sebastian Hohenthal kom fyrstur að marki í seinni kappakstri dagsins en finnskur vann þann fyrri. Hohenthal vann með því sinn fyrsta mótssigur í hinni bresku formúlu-3.

Næst keppa íslensku ökuþórarnir í Snetterton í Englandi 7.-8. júní nk.

Regnhlífin kom að góðu gagni fyrir Viktor Þór þegar tímatökur voru stöðvaðar ítrekað í gær. ap

Kristján Einar á ferð í Rockingham en brautin hallar að hluta.