Viktor Þór á góðar minningar frá Snetterton. mbl.is/jamesbearne

Viktor Þór Jensen verður með 18 bíla á undan sér á rásmarki fyrri formúlu-3 kappakstursins í Snetterton í Norfolk á Englandi á morgun og 17 í seinni kappakstrinum síðar um daginn. Í báðum tímatökum í dag varð hann 16. í alþjóðaflokki af 18 keppendum.

Í seinni tímatökunni var Viktor Þór miklu nær tíma ráspólshafans en í þeim fyrri. Í seinni akstrinum náðust betri brautartímar en í morgun og munaði 1,6 sekúndum á besta tíma Viktors og ráspólshafans, en í fyrri tímatökunum 1,8 sek.

Viktor Þór á góðar minningar frá Snetterton því þar vann hann sigur í landsflokki í formúlu-3 í fyrra.

Það hellirigndi í báðum tímatökum sem hægði mjög á hópnum. Talsvert var um útafakstur og ökumenn áttu erfitt að hemja bíla sína því sleipt var mjög í rennblautri brautinni. Rauðum flöggum var veifað oftar en einu sinni í báðum tímatökum og í þeirri fyrri náði Kristján Einar Kristjánsson aldrei að aka hreinan hring.

„Þegar brautin er svona blaut og margra metra vatnsstrókur stendur aftur úr hverjum einasta bíl er freistandi að hægja á sér án þess að hleypa bílum fram úr og freista þess að búa sér til gott bil í næsta bíl til að ná einum fljúgandi hring. Sérstaklega af því að á Snetterton eru tveir þokkalegar beinir og hraðir kaflar.

Messað yfir ökumönnum

Þegar hins vegar fleiri en einn og fleiri en tveir eru reyna eitthvað í þessa áttina þá fara heilu hringirnir forgörðum hjá næstu mönnum sem á eftir koma. Fjórir hringir í fyrri tímatökunni hjá mér ónýttust út af svona akstri og það gerðist hjá fleirum - enda var fjölmennt í stjórnstöð keppninar þegar dómarar voru að lesa yfir ökumönnunum sem þetta gerðu.

Menn pössuðu sig betur í seinni tímatökunni en það breytti litlu fyrir mig. Uppsetningin á bílnum var ekki að virka og sama gerðist hjá Andy Meyrick liðsfélaga mínum sem hefur til þessa verið á ráspól landflokksins í hverri einustu keppni.

Kristján Einar úti á kornakri

Ég var aldrei nálægt hraðanum sem ég náði á æfingunum í gær þótt ég reyndi og reyndi - með þeim afleiðingum að eftir tímatökurnar líktist bíllinn meira landbúnaðartæki en formúlubíl. Ein beygjan hérna fyrirgefur engin mistök þegar brautin er svona hál og ef hárnákvæmri aksturslínu var ekki fylgt í henni lá leiðin beint út á kornakur við hliðina! Og það enduðum við sex bílar áður en yfir lauk,“ sagði Kristján Einar.

Hann verður með 23 bíla á undan sér á rásmarkinu í fyrra mótinu en 24 í seinni. Ræsir hann af 24. rásstað í fyrra mótinu en 25. í því seinna. Hann varð sjötti af níu í flokknum í fyrri tímatökunum en sjöundi í þeim seinni.

Kristján Einar stóð í slag um fyrstu þrjú fyrstu sætin í landsflokknum á morgunæfingunni í gær. Varð að vísu fyrir bilun í bensíndælu um sama leyti og hætti að rigna og bættu ökumenn allir nema hann tíma sína þegar þeir gátu ekið á þurrdekkjum.