Felipe Massa hjá Ferrari vann ráspól brasilíska kappakstursins en keppinautur hans um heimsmeistaratitil ökuþóra, Lewis Hamilton hjá McLaren, komst ekki framar en í fjórða sæti. Milli þeirra urðu Jarnio Trulli á Toyota og Kimi Räikkönen hjá Ferrari.
Massa var í sérflokki í þriðju og síðustu lotu tímatökunnar. Hamilton átti slaka fyrri umferð og í seinni tímahringnum komst hann ekki ofar en í fjórða sæti. Var á endanum hálfri sekúndu lengur með hringinn, en á þessu stigi er ekki vitað hverjar keppnisáætlanir titilkandídatanna tveggja eru. Það kemur ekki í ljós fyrr en út í kappaksturinn er komið.
Ráspóll Massa er sá sjötti í ár og fimmtándi á ferlinum. Til að verða heimsmeistari, á heimavelli í Sao Paulo, þarf hann að vinna kappaksturinn og vona að Hamilton verði ekki meðal fimm fyrstu í mark.
Trulli vann mjög óvænt annað sætið eftir að liggja í flensu framan af vikunni. Miðað við frammistöðu Toyota í ár gæti það bent til þess að lítið hafi verið af bensíni í bílnum og hann taki sitt fyrsta þjónustustopp snemma.
Heikki Kovalainen hjá McLaren varð fimmti, eða næst á eftir Hamilton og getur varið hann úr því sæti. Á sömu rásröð, á sjötta rásstað, verður Fernando Alonso hjá Renault.
Báðir ökuþórar Toro Rosso komust í lokalotuna. Sebastian Vettel varð sjöundi og Sebastien Bourdais níundi. Milli þeirra varð Nick Heidfeld á BMW, en athygli vekur, að félagi hans, Robert Kubica, komst annan kappaksturinn í röð ekki í lokalotuna.
Hann hefur keppni þrettándi og má mikið vinna á til að missa ekki þriðja sætið í stigakeppni ökuþóra til Räikkönen. Einu sæti aftar verður David Coulthard hjá Red Bull í sínum síðasta kappakstri í formúlu-1.
Williamsliðinu gekk vel á æfingum í morgun og gær og virtist til alls líklegt. Liðið galt hins vegar afhroð í tímatökunum þar sem Kazuki Nakajima varð aðeins 16. og Nico Rosberg 18.
Niðurstaða tímatökunnar varð sem hér segir:
Röð | Ökuþór | Bíll | Lota 1 | Lota 2 | Lota 3 | Hri. |
---|---|---|---|---|---|---|
1. | Massa | Ferrari | 1:11.830 | 1:11.875 | 1:12.368 | 17 |
2. | Trulli | Toyota | 1:12.226 | 1:12.107 | 1:12.737 | 15 |
3. | Räikkönen | Ferrari | 1:12.083 | 1:11.950 | 1:12.825 | 19 |
4. | Hamilton | McLaren | 1:12.213 | 1:11.856 | 1:12.830 | 14 |
5. | Kovalainen | McLaren | 1:12.366 | 1:11.768 | 1:12.917 | 17 |
6. | Alonso | Renault | 1:12.214 | 1:12.090 | 1:12.967 | 18 |
7. | Vettel | Toro Rosso | 1:12.390 | 1:11.845 | 1:13.082 | 20 |
8. | Heidfeld | BMW | 1:12.371 | 1:12.026 | 1:13.297 | 18 |
9. | Bourdais | Toro Rosso | 1:12.498 | 1:12.075 | 1:14.105 | 16 |
10. | Glock | Toyota | 1:12.223 | 1:11.909 | 1:14.230 | 24 |
11. | Piquet | Renault | 1:12.348 | 1:12.137 | 13 | |
12. | Webber | Red Bull | 1:12.409 | 1:12.289 | 13 | |
13. | Kubica | BMW | 1:12.381 | 1:12.300 | 13 | |
14. | Coulthard | Red Bull | 1:12.690 | 1:12.717 | 16 | |
15. | Barrichello | Honda | 1:12.548 | 1:13.139 | 14 | |
16. | Nakajima | Williams | 1:12.800 | 9 | ||
17. | Button | Honda | 1:12.810 | 9 | ||
18. | Rosberg | Williams | 1:13.002 | 8 | ||
19. | Fisichella | Force India | 1:13.426 | 9 | ||
20. | Sutil | Force India | 1:13.508 | 9 |