Hartley sigri hrósandi á verðlaunapalli í Spa í Belgíu í fyrra.

Nýsjálenski ökuþórinn Brendon Hartley hefur verið ráðinn sem vara- og reynsluökumaður Red Bull liðsins. Tekur hann við því hlutverki af David Coulthard. Hartley var liðsfélagi Kristjáns Einars Kristjánssonar hjá Carlinliðinu í formúlu-3 í fyrra.

Hartley, sem er aðeins 19 ára,  fékk svonefnt ofurskírteini í vikunni en það er forsenda þátttöku í formúlu-1.  Hann varð í þriðja sæti í keppni ökuþóra í alþjóðaflokknum í hinni bresku formúlu-3 í fyrra. 

Vegna banns við reynsluakstri er ólíklegt að hann fái mikið að spreyta sig í bíl Red Bull. Verður samt hluti af liðinu og mun við það öðlast nýja þekkingu.

Hartley mun keppa fyrir Carlin í Evrópumótaröðinni í formúlu-3 og einnig í Renaultformúlunni svonefndu.  Keppir í henni um helgina í Spa í Belgíu og Evrópuröðinni í F-3 eftir hálfan mánuð. Í millitíðinni verður hann liðsmaður hjá Red Bull í Spánarkappaksturinn í Barcelona.

Hartley fremstur í flokki í formúlu-3 í Thruxton í Bretlandi í fyrra. mbl.is/brendonhartleymotorsports