Vettel kátur á palli í Monza. reuters

Toro Rosso liðið líður fyrir burtför Sebastians Vettel til móðurliðs Red Bull. Hefur frammistaða ítalska smáliðsins verið mun lakari í ár en í fyrra er Vettel var þar ökumaður.

Brottför Vettels virðist hafa bitnað harkalega á Toro Rosso. En forsvarsmenn þess binda þó vonir við að nýliðinn Sebastien Buemi eigi eftir að skila því svipuðum árangri í framtíðinni og Vettel gerði í fyrra.

Keppnisbíllinn, STR4, hefur reynst mun lakari en bílar annarra liða og liðið hefur ekki haft fjármuni til að leggja í mikla þróunarvinnu og endurbætur á honum.

Hermt er að bíllinn sé gallaður í grunninn en tæknistjórinn Giorgio Ascanelli segir samt, að ökumaður bílsins skipti miklu máli um árangur. Segir hann að framfarir liðsins á seinni hluta síðasta árs sé vegna framlags Vettels. Hann braut blað í sögu liðsins með því að vinna fyrsta sigur þess frá upphafi. Það gerði hann í ítalska kappakstrinum í Monza í september í fyrra.

Ascanaelli segir Vettel hafa tekið stórstígum framförum meðan hann var hjá Toro Rosso og verið fljótur að átta sig á hvort breytingar á bílnum skiluðu tilætluðum árangri.

Þar sem Sebastien Bourdais hefur verið settur af er Buemi orðinn aðal ökuþór þess, en hann á aðeins níu mót að baki í formúlu-1 og féll úr leik í fjórum þeirra mjög snemma. Þrátt fyrir reynsluleysið er við miklu búist af honum þegar fram líða stundir.

Orðrómur er á kreiki þess efnis að tvítugur spænskur ökumaður, Jaime Alguersuari, verði ráðinn til að keppa fyrir Toro Rosso í stað Bourdais. Hann varð meistari í hinni bresku formúlu-3 í fyrra.

Vettel fagnar á innhring í Monza. reuters

Vettel á leið til sigurs í Monza. reuters