Alguersuari í stjórnklefa bíls Red Bull. mbl.is/tororosso

Fernando Alonso, fyrrverandi heimsmeistari í formúlu-1, segir landa sinn og nýliða, Jaime Alguersuari, vera tilbúinn til keppni í íþróttinni. Hann verður yngsti ökuþór til að hefja keppni í formúlu-1 í Búdapest á sunnudag, 19 ára og fjögurra mánaða.

Alonso var sjálfur rúmra 19 ára er hann hóf keppni hjá Minardi árið 2001og því vart annars að vænta en hann stæði með Alguersuari sem kemur til leiks með enn minni reynslu af formúlu-1 bíl en Alonso á sínum tíma.

„Þess sjást merki að hann sé mjög fær ökuþór. Ef menn komast í formúlu-1 þá er það vegna þess að menn eru góðir ökumenn og því skyldu menn engan kvíðboga bera,“ sagði Alonso við fréttastofuna EFE.

„Ég er hlynntur því að menn byrji eins ungir og hægt er. Ég hef óskað honum til hamingju og óska honum frábærrar framtíðar,“ bætti meistarinn fyrrverandi við.

Eina reynsla Alguersuari af formúlu-1 bíl eru tvær bílprófanir á flugbraut þar sem einungis var ekið fram og til baka eftir þrábeinni brautinni.

Alguersuari fylgist með á stjórnborði hjá Red Bull liðinu. mbl.is/tororosso

Alonso segir Alugersuari tilbúinn til keppni í formúlu-1. mbl.is/tororosso