Bourdais (t.h.) og Nicolas Todt. mbl.is/tororossof1

Franski ökuþórinn Sebastien Bourdais höfðar ekki mál á hendur Toro Rosso fyrir samningsrof og ólögmætan brottrekstur. Hefur hann náð fullum sáttum við liðið sem vék honum úr starfi eftir þýska kappaksturinn.

Franska íþróttadagblaðið L'Equipe hefur þetta eftir umboðsmanni Bourdais,  Nicolas Todt. Bourdais var vikið úr starfi fjórum dögum eftir kappaksturinn í Nürburgring. Í stað hans var ráðinn spænskur táningur, Jaime Alguersuari.

Bourdais fól þegar í stað lögmönnum sínum að skoða málið með tilliti til málshöfðunar.

Todt segir hins vegar að viku eftir þýska kappaksturinn hafi fullar sættir tekist. "Þeir vissu að þeir voru með tapað mál í höndunum," segir Todt.

Bourdais sagði að hann myndi freista þess frekar að halda velli á vettvangi formúlu-1. Honum mun þó hafa verið boðið starf í bandaríska IndyCar-kappakstrinum. Honum gekk vel í keppni í Bandaríkjunum áður en hann hvarf til starfa í formúlu-1 og varð m.a. fjórum sinnum meistari þar í landi.

Bourdais á ferð á Toro Rosso-bíl. mbl.is/tororossof1