Bourdais á bíl Toro Rosso. reuters

Franski ökuþórinn Sebastien Bourdais sakar fyrrverandi vinnuveitiendur sína hjá Toro Rosso um taktleysi með því að tilkynna sér uppsögn með smáskilaboði (sms). Þetta segir Bourdais til marks um skort á „stíl“. 

Bourdais hinum þrítuga var tjáð eftir þýska kappaksturinn í Nürburgring að  þjónustu hans í þágu liðsins væri ekki lengur þörf. Í hans stað var ungur ökumaður á framfæri Red Bull skipaður í sæti hans, Jaime Alguersuari.

„Aðferðin sem notuð var til að losa sig við mig var mjög svekkjandi. Dietrich Mateschitz¨[auðkýfingurinn sem á bæði Red Bull og Toro Rosso] var í Nürburgring en yrti ekki á mig. Hann hringdi ekki heldur. Allt var gert með sms, sem að mínu áliti er enginn stíll yfir,“ segir Bourdais við franska akstursíþróttaritið Autohebdo.  

Í millitíðinni hefur Bourdais sæst við Toro Rosso og stefnir því ekki liðinu fyrir rétt fyrir samningsrof.

Bourdais, sem varð meistari í bandaríska Champ Car kappakstrinum fjögur ár í röð, játar að hann eigi sinn þátt í því að hann náði sér aldrei á strik á hálfri annarri vertíð með Toro Rosso.

Hann segir að keppnisbíll liðsins, sem var sá sami og hjá Red Bull þar til í ár, hafi ekki verið smíðaður með ökumann í huga, heldur hafi það verið undir ökumanni komið að aðlagast honum. „Það var aldrei mín sterka hlið,“ segir Bourdais.

Bourdais átti erfitt með aðlögun að bíl Toro Rosso. ap