BMW þakkar og kveður Kubica
Kubica mun sitja í Renault á næsta ári. TIM CHONG
BMW-liðið hrósaði Roberet Kubica í hástert í dag og þakkaði honum mikið framlag til liðsins á undanförnum þremur árum. Óskaði það honum jafnframt velfarnaðar hjá nýjum vinnuveitanda, Renaultliðinu.
Enn einn langvarandi orðrómurinn af vettvangi formúlu-1 var staðfestur sem sönn saga í dag, er Renault tilkynnti formlega, að Kubica verði ökumaður liðsins á næsta ári í stað Fernando Alonso.
Mario Theissen, liðsstjóri BMW, sagði, að framlag Kubica til sögu BMW yrði ætíð haft í hávegum. Hann vann bæði fyrsta ráspól liðsins og fyrsta sigur þess, árið 2008. Háði hann lengi keppni um heimsmeistaratitil ökumanna í fyrra.
„Robert lék mikilvægt hlutverk fyrir okkur - og við fyrir hann. Hann kom til liðs við okkur árið 2006 sem reynsluökuþór án reynslu af formúlu-1. Og á því ári var hann hækkaður í tign á miðju tímabilinu og gerður að keppnisþór.Hann olli okkur aldrei vonbrigðum og með fyrsta ráspól okkar í Barein í fyrra og fyrsta sigri okkar sama ár í Kanada markaði hann þátttaskil í sögu liðsins. Við erum þakklát fyrir stöðuga og öfluga frammistöðu og óskum honum velfarnaðar,“ sagði Theissen.
Kubica tók á miðju keppnistímabilinu 2006 við ökumannsstarfi af Jacques Villeneuve. Í aðeins sínu þriðja móti komst hann á verðlaunapall með þriðja sæti í ítalska kappakstrinum í Monza.
BMW kvaddi Kubica með miklu lofi.
Kubica tekur við af Alonso. reuters
