Renault segir vertíðina 2010 þegar byrjaða
Renault væntir betri árangurs 2010 þótt Alonso njóti ekki lengur við. SERGIO MORAES
Jean-Francois Caubet, framkvæmdastjóri formúluliðs Renault, vísar því á bug að franski bílsmiðurinn muni fylgja Toyota og hætta keppni. Hann segir helgun Renault ótvíræða.
Caubet segir þetta í samtali við franska íþróttadagblaðið L'Equipe. Hann segir skipulag, áætlanagerð og undirbúning fyrir næsta ár langt á veg komið.
„Við höfum þegar ráðið ökumenn, fengið fjárhagsáætlun okkar samþykkta og skráðir til þátttöku í formúlu-1. Keppnistímabilið 2010 er þegar hafið hvað okkur varðar,“ segir Caubet.
Hann segist ekki búast við meistaratitlum á næsta ári en mun betri árangri en í ár. Nýliðin keppnistíð var ein sú lakasta hjá Renaultliðinu frá árinu 2001.
