Beðið er niðurstöðu FIA um hvort arftaki BMW-liðsins verði með á næsta ári. SERGIO MORAES

Í höfuðstöðvum hins fráfarandi formúluliðs BMW í Hinwil í Sviss er beðið svara frá Alþjóða akstursíþróttasambandinu (FIA) um stöðu liðsins í framhaldi af því að Toyota hefur dregið lið sitt úr keppni.

Með ákvörðun Toyota opnaðist líklega sæti á rásmarkinu fyrir arftaka BMW, sem ekki hefur fengið nafn en er almennt nefnt undir gamla nafni liðsins, Sauber.

Toyota skuldbatt sig hins vegar til keppni út 2012 með undirritun svonefnd concorde-samkomulags. Það gerði BMW hins vegar ekki áður en frestur til þess rann út. 

BMW var því úthlutað sæti 14. liðsins og þar með aðild að keppni 2010 ef eitthvað lið  félli úr. Í því sambandi var fremur búist við að eitthvert nýju liðanna þriggja kæmust ekki á rásmarkið.

Vegna undirritunar Toyota undir concorde-samkomulagið munu nýir eigendur liðsins, verði það selt, halda sæti. Meðan málið er ekki til lykta leitt af FIA er Sauber, og eigendur þess, hangandi  í lausu lofti.