Theissen (nær) og Sauber skýra frá kaupum þess síðarnefnda á BMW liðinu. reuters

Mario Theissen hefur ákveðið að halda starfi sínu sem yfirmaður akstursíþróttadeildar þýska bílaframleiðandans BMW fremur en fylgja formúluliði BMW sem selt hefur verið til baka til fyrrum eiganda þess, Peter Sauber.

Er BMW ákvað að draga sig út úr formúlu-1 sagðist Theissen opinn fyrir því að fylgja liðinu til nýrra eigenda og stjórna því áfram. Með ákvörðun hans nú heyrir það sögunni til og hverfur hann því af vettvangi formúlunnar einnig.

BMW keypti Sauberliðið af Peter Sauber fyrir fjórum árum. Eftir að sala á því til fjárfestingarfélags með rætur í arabaríkjum fór út um þúfur seldi BMW liðið til baka til Sauber.

Alþjóða akstursíþróttasambandið (FIA) hefur enn ekki staðfest hvort það verði meðal keppnisliða formúlu-1 á næsta ári. Á vefsetrinu formula1.com segist Sauber mjög bjartsýnn á að liðið verði með og býst hann við staðfestingu á því fljótlega.

Hann segir smíði 2010-bílsins hafa miðað mjög vel og óvissa um framtíð liðsins hafi engu raskað í þeim efnum.

Sauber er bjartsýnn á að lið hans keppi í formúlu-1 á næsta ári. reuters

Peter Sauber hefur keypt lið sitt gamla til baka frá BMW.