Kobayashi verst Button og Nakajima í Sao Paulo. mbl.is/toyotaf1

Kamui Kobayashi, varamaðurinn sem sló í gegn hjá Toyota í tveimur síðustu mótum ársins, mun keppa í formúlu-1 á næsta ári. Hann hefur verið ráðinn til Sauberliðsins.

Kobayashi stóð sig fádæma vel í brasilíska kappakstrinum og síðan í Abu Dhabi. Þótti stefna í að hann yrði ráðinn til að keppa fyrir Toyota á næsta ári, en nokkru eftir vertíðarlok ákvað Toyota hins vegar að draga sig út úr keppni í formúlu-1.

„Allt frá því ég hóf keppni í akstursíþróttum hefur mig dreymt um að keppa í formúlu-1. Nú er sá draumur að rætast,“ segir Kobayashi í tilefni ráðningarinnar til Sauber, arftaka BMW-liðsins.

„Ég er alsæll yfir því að frammistaða mín í tveimur síðustu mótunum í ár hafa tryggt mér keppnissæti. Ég mun gera mitt besta fyrir lið Peter Sauber og er stoltur yfir því að geta haldið nafni Japans á lofti í formúlu-1,“ bætir  hann við.

Með samningnum við Sauber sleppur Kobayashi við að þurfa snúa heim til Japans og vinna á sushi-veitingastað föður síns. Það sagði hann verða hlutskipti sitt eftir lokamótið í Abu Dhabi, finndi hann ekki nýtt starf í formúlunni.

Kobayashi á ferð í lokamótinu í Abu Dhabi. reuters

Kobayashi ræðir við tæknimann hjá Toyotaliðinu. mbl.is/toyotaf1