Renault keppir áfram eins og ekkert hafi í skorist. SERGIO MORAES

Renault hefur staðfest það sem legið hefur í loftinu, að það verði áfram í formúlu-1 um ókomin ár. Hins vegar hefur stór en ótilgreindur hlutur í liðinu verið seldur fjárfestingarfélaginu Genii sem er með bækistöðvar í Lúxemborg.

Ekkert af þessu eru nýjar fréttir fyrir lesendur formúluvefjar mbl.is en með staðfestingunni eru margra vikna óvissutímar um framtíð Renaultliðins að baki. 

Renault tók viðskiptajöfurinn Gerard Lopez fram yfir hinn breska kappakstursfrömuð David Richards. Renault og Lopez munu reka liðið í samstarfi en samningar þeirra eru ekki að fullu frágengnir.

Liðinu verður teflt fram í nafni Renault og undir merkjum franska bílsmiðsins. Sér hann fram á að formúla-1 verði umhverfisvænni með tímanum og mun óspart hvetja til þess.

Í yfirlýsingu segir Renault ákvörðun sína um að halda áfram keppni í formúlu-1 endurspegla traust í garð yfirvalds íþróttarinnar um að gera íþróttina vistvænni.

Hyggst Renault m.a. nota þátttöku sína til að sannreyna færni sína til að framleiða kraftmikla en sparneytna bíla.

Þá staðfesti Renault jafnframt í gær, að það myndi áfram sjá Red Bull liðinu fyrir mótorum í keppnisbíla sína á næsta ári.