Sauber frumsýnir 31. janúar
Peter Sauber hefur keypt lið sitt gamla til baka frá BMW. reuters
Sauber er fyrsta formúluliðið sem dagsett hefur frumsýningu 2010-bíls. Verður hann sviptur hulum við Valenciabrautina á Spáni 31. janúar en daginn eftir hefjast fyrstu vetraræfingar formúluliðanna þar.
Samtök formúluliðanna (FOTA) höfðu gert sér vonir um að öll liðin 13 sýndu bíla sína þar á sameiginlegri frumsýningarathöfn. Af því gat ekki orðið í ár en stefnt er að slíkum viðburði árið 2011.
Peter Sauber, stofnandi liðsins, hefur eignast það aftur eftir að sala á BMW-liðinu til fjárfestingarfélagsins Qadbak gekki til baka. Formlega er liðið enn kennt við BMW auk Sauber og óljóst hvort því verður breytt áður en fyrsta mót vertíðarinnar rennur upp.
Sauber mun ekki nota BMW-mótora í bílunum heldur hefur hann aftur tekið upp samstarf við sinn fyrri mótorsmið, Ferrari. Aðeins einn ökuþór hefur enn sem komið er verið ráðinn til Sauber, Japaninn Kamui Kobayashi sem sló í gegn sem nýliði og varamaður hjá Toyota í síðustu tveimur mótum nýliðinnar vertíðar.
Kamui Kobayashi sló í gegn á Toyotu í tveimur síðustu mótunum 2009. mbl.is/toyotaf1
