Pedro de la Rosa við skyldustörf hjá McLaren í Silverstone 2005. mbl.is/Ágúst Ásgeirsson

Pedro de la Rosa hefur verið ráðinn til að keppa fyrir Sauberliðið í ár, en hann er 38 ára og hefur verið varaökumaður McLarenliðsins frá 2003. Hann verður liðsfélagi japanska nýliðans Kamui Kobayashi, sem er 15 árum yngri.

De la Rosa hóf þátttöku í formúlu-1 árið 1998 sem reynsluökumaður Jordanliðsins. Árið eftir gerðist hann keppnismaður Arrowsliðsins og þreytti frumraun sína í Melbourne. Stóð hann sig firna vel því á frekar slökum bíl kláraði hann keppni í stigasæti, eða því sjötta. 

Spænski ökuþórinn ók einnig fyrir Arrows 1999 og 2000 en gekk til liðs við Jagúar og keppti fyrir það lið 2001 og 2002.

De la Rosa á 71 mót að baki en níu sinnum hljóp hann í skarð keppnisþóra McLaren á árunum sjö sem hann starfaði þar. Það nýtti hann sér vel, kláraði keppnina í Barein 2005 í fimmta sæti og setti hraðasta hring dagsins í leiðinni.

Árið eftir keppti hann í helmingi mótanna eða átta. Í þeim aflaði hann 19 stiga í titilkeppninni og komst á verðlaunapall í ungverska kappakstrinum í Búdapest. Kláraði það mót í öðru sæti sem er hans besti árangur í formúlu-1.

Peter Sauber sagði í dag, að lið hans ætti eftir að njóta góðs af því að de la Rosa hefði starfað hjá toppliði undanfarin sjö ár. Þess muni Kamui njóta líka.

Pedro de la Rosa á palli í fyrsta sinn, í Búdapest 2006. mbl.is/mclarenf1