Button heimsótti Huga Boss í tilefni tískuvikunnar í Berlín í byrjun vikunnar.

Jenson Button segist vilja tilheyra minnihlutahóp ökuþóra í sögu formúlu-1. Skírskotar hann til þess, að einungis 30% heimsmeistara hafa unnið titilinn árið eftir fyrsta titilinn.

Meðal keppinauta Buttons í ár verða tveir úr þessum hópi, Michael Schumacher hjá Mercedes og Fernando Alonso hjá Ferrari. Schumacher hefur tekist það oftar en einu sinni og Alonso á árunum 2005 og 2006.

„Tekst mér að verja titilinn? Það er takmarkið. Og það er athyglisvert, að 70% meistaranna hefur ekki tekist það árið eftir. Maður verður því að reyna átta sig á hvers vegna 30% tókst það og mæta andlega tilbúinn til leiks. Að því vinn ég nú,“ sagði Button við breska blaðið The Sun.

Button keppir fyrir McLaren í ár og verður liðsfélagi hans heimsmeistarinn frá í hitteðfyrra, Lewis Hamilton. Hann telur þá eiga eftir að færa McLaren mikla sigra í ár, takist þeim að búa svo um hnúta í bílþróuninni að keppnisbíllinn verði full klár strax í fyrsta móti.

Button mætti með fullbúinn bíl í fyrra og vann fyrstu sjö mót ársins. Hann segir erfitt að leika það eftir, en öllu skipti að bíllinn sé klár í toppslaginn frá fyrstu ræsingu.